முத்தமிழ் நெறி பற்றிய ஆய்வு

முன்னோர்கள் நமது தமிழை மூன்றாய் வகுத்து பழக்கியமைக்கு காரணம் உண்டு. அதற்கென நெறி வகுத்து அந்த நெறி பிறழாமல் அதனை கடைப்பிடித்தும் வந்தனர். ஆனால் இன்றய காலகட்டத்தில் அதன் ஒழுங்கு நிலை மாறி அதன் தன்மையே உணரப்படாமல் இருக்கின்றது. ஆனால் இந்த பகுப்பு முறை அந்தக் காலத்திற்கு மட்டுமின்றி காலங்கடந்து நின்று, இந்தக் காலத்திற்கும் எதிர்காலத்திற்கும் கூட துணை நிற்பனவாய் அமைந்துள்ளது. அந்த அளவிற்கு அதன் அறிவியல் தன்மை நுட்பமாய் உள்ளது. எனவே அதை மீளுருவாக்கம் செய்து நவீன தொழில் நுட்பத்திலும் அதை புகுத்துவது என்பது பற்றியே இந்த ஆய்வு மேற்கொள்ளப்படுகிறது...

இவ்வாறு செய்வதன் மூலம் தமிழுக்கு என்ன நன்மை நமக்கு என்ன நன்மை? என்று பார்த்தோமானால். இன்றைய தகவல் தொழில்நுட்ப அறிவியலில் உள்ள சில இடைவெளிகளை தமிழால் நிரப்ப முடியும் என்ற கருத்தைத் தாங்கி ஆய்வை கொண்டு செல்கிறோம். அது வெற்றியடையும் போது தமிழும் ஒரு தொழில் நுட்ப மொழியாகவும் வணிக மொழியாகவும் மாறிவிடும். இதனால் நமக்கு ஏற்படும் இலாபங்களை பகுதி பகுதியாக காண்போம். அதற்கு முன் சில அடிப்படைகளை தெரிந்து கொள்ளுங்கள்.

மொழி எதற்கு? யாருக்கு?

மனிதன், தான் உணர்ந்ததை, அடுத்த மனிதனுக்கு உணர்த்த செய்யும் செயல் முறையே, மொழியாகும். மொழியால்தான் அவனது சிந்திக்கும் திறன் மேம்படுகிறது. செயல்திறன்கள் கூட வேகமடைகிறது. இதன் பொருட்டே தன்னை உயர்திணையாகவும் மற்ற உயிரினங்களை, அஃது இல்லாத திணையாகவும் (அஃறிணையாகவும்) பிரித்துக்கொண்டுள்ளான்.

மற்ற உயிரினங்கள் அவற்றிக்கென்று உள்ள உயிரோசையை மட்டும் ஒரே விதத்தில் எழுப்புகிறது. ஆனால் மனிதனுக்கும் கிளிகளுக்கும் தொண்டையில் குரல்வளை என்ற அமைப்பு உள்ளதால் மாறுபட்ட ஒலியோசைகளை எழுப்ப முடிகிறது. எனவேதான் மனிதனுக்கு மொழி என்ற தகவல் கட்டமைப்பு எளிதாகிறது.

உயர்திணையான மனிதனுக்கு ஐந்து புலப்பொறி மூலம் ஐந்து புலனறிவுகள் கிடைக்கின்றன அதுமட்டும் அல்லாமல் ஆறாவதாக மணம் என்ற சிந்தனை அறிவும் அவனுக்கு அமைந்துள்ளது. அதன்படி அவனது ஐம்பொறிகள் மூலம் அவன் உணரும் ஐம்புலன்கள் பற்றி கொஞ்சம் விரிவாக ஆய்வோம்.

இவ்விரண்டிற்கும் இன்றைய காலக்கட்டத்தில் கருவிகள் கூட மிகத் துல்லியமான துணையாக இருக்கிறது. அவற்றை பிறருக்கு கருவியின் வாயிலாகவே பரிமாறிக் கொள்ளவும் முடிகிறது.

இந்நிலையில் தகவலைத் தரும் ஒரு நபர் அல்லது அதை பெரும் ஒரு நபர் இவர்களில் எவருக்கேனும் அவர்களுடைய புலணுறுப்பில் குறையிருப்பினும் தகவல் முழுமையாக சென்றடைய வேண்டும் என்ற நோக்கிலே பின்வருமாறு தமிழை மூன்றாக பகுத்தனர். அவைதாம் 1. இயல் 2. இசை 3. நாட்டியம்.

இம்மூன்றனுள்ளும் இரண்டிரண்டு பகுப்புகள் உள்ளன. அவைதாம் இயலினுள் 1. சித்திரம் 2. எழுத்து என்பதும். இசையினுள் 1. குரலோசை 2. இசைக்கருவி என்பதும். நாட்டியத்தினுள் 1. முத்திரை 2. பாவம் என்பதுமாகும்.

புலணுறுப்பில் காணப்படும் குறையின் நிமித்தம் இவை எவ்வாறு எடுத்தாளப்படுகிறது என்பதை ஆய்வோம்.

• தகவல் தருபவருக்கு வாய் பேசமுடியாது அதுபோல் தகவல் பெறுபவருக்கு தகவல் தருபவரின் மொழி தெரியாது என்பதாகக் கொண்டால், தகவல் தருபவர், இயல் என்னும் தமிழில் சித்திரம் என்னும் கலையை பயன்படுத்தி தகவலைத் தெரிவிக்கலாம். இவற்றிலும் 1. கோலம் 2. தீட்டல் என்ற இரண்டு செய்முறை உள்ளது.
• தகவல் தருபவருக்கு வாய் பேசமுடியாது அதுபோல் தகவல் பெறுபவருக்கு மொழி தெரிந்திருந்தால். தகவல் தருபவர், இயல் என்னும் தமிழில் எழுத்து என்னும் கலையைப் பயன்படுத்தி தகவலைத் தெரிவிக்கலாம்.
• தகவல் தருபவருக்கு வாய் பேசமுடியாது அதேபோல் தகவல் பெறுபவருக்கு கண் பார்வைத் தெரியாது என்பதாகக் கொண்டால், தகவல் தருபவர், இசை என்னும் தமிழில் இசைக்கருவி என்னும் கலையைப் பயன்படுத்தி தகவலைத் தெரிவிக்கலாம்.
• தகவல் தருபவருக்கு வாய் பேசமுடியாது அதேபோல் தகவல் பெறுபவர் காது கேளாதவராக இருந்தாலோ அல்லது கேட்கும் தூரத்திற்கும் அப்பால் இருந்தாலோ அல்லது இயற்றமிழுக்கான பொருட்கள் கைவசம் இல்லாமல் போனாலோ, நாட்டியம் என்னும் தமிழில் முத்திரை அல்லது பாவம் என்னும் கலையைப் பயன்படுத்தி தகவலைத் தெரிவிக்கலாம்.
• தகவல் தருபவருக்கு கைகால்கள் முடக்கம் ஆகியிருக்கலாம். அதேபோல் தகவல் பெறுபவர் கண் பார்வை மட்டும் இல்லாதவராக இருந்து ஆனால் மொழி தெரிந்தவராக இருந்தால் இசை என்னும் தமிழில் குரலோசை என்னும் கலையைப் பயன்படுத்தி தகவலைத் தெரிவிக்கலாம்.
• அனைத்தும் நிறைவாகப் பெற்றவர்கள் ஆறு வகையிலும் தகவல் தரவும் பெறவும் செய்யலாம்.

இவ்வாறாக முத்தமிழின் பயன்பாடு எடுத்தாளப்படுகிறது. மேலும் இன்றைக்கு நவீன கருவிகள் நம்மோடு தகவல் கடத்துதலில் இணைப்பில் இருக்கிறது. அவற்றை இயக்குபவர்களாக நாம் இருக்கின்றோம். சில வேளைகளில் அவைகள் நம்மை இயக்குகின்றது. அவற்றை கையாளுவதில் நமக்குள்ள சிரமங்களைப் பற்றி நாம் காண்போம். ஏனென்றால் இந்த முத்தமிழ் பகுப்பு முறை அவற்றிற்கும் சில வழிகாட்டுதல்களை தருகிறது. இந்த வகையில் ஆய்வை நாம் கொண்டு செல்லும் போது கணினி தொழில் நுட்பத்தில் தமிழின் இன்றியமையாமை பற்றி உங்களுக்கு புரியவரும்.

இயற்றமிழின் கருவிகள்:

• 1. சுவர் பரப்பில் கரித்துண்டுகளும் சுண்ணக்கட்டிகளும் செம்மண் சாந்துகளும்
• 2. கல்வெட்டு எழுத்தாகவும், சித்திரமாகவும், சிற்பமாகவும், சிலையாகவும்.
• 3. பனையோலைச் சுவடிகள்
• 4. செப்பேடுகள்
• 5. தாள் மற்றும் எழுத்து கோள்கள் இயற்பியல் அச்சு எந்திரங்கள்
• 6. தாள் மற்றும் மின்சார அச்சு எந்திரங்கள்
• 7. மின்திரை மற்றும் மின்னொளிப் பதிவு கருவி

முத்தமிழ் நெறி ஆராய்ச்சி

மூன்று தமிழுக்கும் நெறி வகுத்து, அவற்றை முறையாக கணினிக் கட்டளைகளாகக் மாற்றி தகவல் தொழில்நுட்ப பயன்பாட்டிற்குள் கொண்டு வருதல் இதன் மூலம் பிழையில்லா நவடிக்கைகள் செய்ய முடியும்.

இயற்றமிழ் நெறி:

1. சித்திரம்

• 1.1 கோலம் செயலி
• 1.2 வடிவ பொருத்திகள் செயலி
• 1.3 தமிழ் எழுத்து வடிவச்சித்திரம்

2. எழுத்து

• 2.1 புதிய எழுத்துரு விளக்க சித்திரங்களுடன்.
• 2.2 புதிய எழுத்துருவில் மக்கள் பயன்பாட்டு இணைய தளம்.
• 2.3 சொல்லாய்வுச் செயலி
• 2.4 வாக்கிய ஆய்வுச் செயலி
• 2.5 யாப்பு ஆய்வுச் செயலி

இசைத்தமிழ் நெறி:

1. குரல்

• 1.1 குரல் பகுப்பாய்வுச் செயலி
• 1.2 எழுத்துரு கூறல் செயலி

2. கருவி

• 2.1 தமிழ் கருவி தீண்டல் செயலி

நாட்டியத்தமிழ் நெறி:

1. முத்திரை

• 1.1 முத்திரை பொருள் கூறல் செயலி

2. பாவம்

• 1.2 பாவம் பொருள் கூறும் செயலி